Sa Babaeng Nakasakay Ko Sa Jeep Patungong Botohan

Aksidenteng nakatabi kita kanina Sa loob ng pampasaherong jeep Ako, patungong presinto upang muli’y Manhid na bomoto Ikaw, pun...

Aksidenteng nakatabi kita kanina

Sa loob ng pampasaherong jeep

Ako, patungong presinto upang muli’y

Manhid na bomoto

Ikaw, puntang kung-saan, mukhang

Di ko naman mapigurahan.

Nakasuot ka ng puti buong katawan,

Marahil buhat sa pagamutang pinapasukan.

Paharurot ang takbo ng sasakyan

At ang mahabang buhok mo ay

Mabining wasiwas ng hangin

Napapaligaw ang ilang hibla sa aking mukha

Wari’y may angkas na pinong aroma sa pandama

At sa aking pagbaba ng jeep

At pagpasok sa presinto ay kumbakit

Kay gaan ngayon ng aking pagboto.

Mayo 14, 2018

Tumbas ‘JB’ Manipis