Pulong na seguridad sa mga barangay na area of responsibility vs COVID 19 isinagawa

By Tagkawayan Teleradyo July 18, 2020 Tagkawayan Municipal Mayor Carlo Eleazar (Photo by Tagkawayan Teleradyo) TAGKAWAYAN, Quezon...

By Tagkawayan Teleradyo
July 18, 2020

Tagkawayan Municipal Mayor Carlo Eleazar (Photo by Tagkawayan Teleradyo)

TAGKAWAYAN, Quezon - Upang suportahan ang bayan ng Guinayangan, Quezon sa mga hakbang nito upang mapigilan ang lalo pang pagdami ng kaso ng Coronavirus Disease 2019 (COVID-19) nagpatawag ng espesyal na pulong sa mga kapitan at hepe ng mga tanod sa railroad zone, coastal barangays, SANMANDELCAR area at Inter-Agency Task Force si Mayor Carlo Eleazar ngayong umaga ng sabado July 18, 2020.

Sentro ng pulong ang seguridad sa mga barangay ng nabanggit na area of responsibility (AOR) lalo na ang pinaka-malalapit sa bahagi ng Guinayangan partikular ang Aloneros na kabilang sa mga naka-lockdown ngayon batay sa anunsyo ni Mayor Boyboy Isaac kaninang umaga.





Ilan pa sa kanilang barangay na naka lockdown ngayon ay ang Danlagan batis, Bukal Maligaya, Tikay, Danlagan Central, Danlagan Reserva, at Gapas. Nadagdagan pa ng isa (1) ang kanilang pitong (7) bagong kaso doon kung kaya may kabuuan nang sampu (10) kasama ang iba pang una nang naiulat.

Sinabi ni Mayor Carlo, batay na rin aktibong koordinasyon nila ni Mayor Isaac ay paiigtingin ang pagpapatupad ng hindi muna pagpasok ng mga Taga-Guinayangan sa ating bayan at ganun din ang mga residente ng Tagkawayan ay hindi muna papayagang makapunta sa Guinayangan.





“Nasa bakod na po natin ang panganib. Habang may aktibong kaso, magtataas tayo ng antas ng seguridad” ayon kay Mayor Eleazar.

Dagdag pa ng alkalde na nawa ay malampasan agad ng Guinayangan ang sitwasyon at ma-contain agad nila ang bilang ng mga kaso ng COVID-19 sa kanilang bayan.