Road clearing operation isinagawa sa ilang lansangan ng lungsod

by PIO Lucena/ R. Lim February 22, 2021 Mga tauhan ng lokal na pamahalaan. (Photo ...

by PIO Lucena/ R. Lim
February 22, 2021

Mga tauhan ng lokal na pamahalaan. (Photo from PIO Lucena)

Upang maging maayos at malinis sa paningin ng mga Lucenahin ang ilang mga lansangan ng lungsod, nagsagawa ng road clearing operation ang mga tauhan ng lokal na pamahalaan kamakailan.

Magkakatuwang na isinagawa ang nasabing operasyon ng mga tauhan ng Traffic Management Section, Lucena PNP, City Engineering Office, Tricycle Franchising and Regulatory Office at Lucena Disaster Risk Reduction and Management Office.



Nagsimulang linisin ng mga nasabing tauhan ang kahabaan ng Quezon Avenue atC.M. Recto na kung saan ay iniaalis ang mga nakakasagabal sa mga lansangan.

Binigyang paalala rin ng mga ito ang lahat ng mga may-ari ng business establishments na mahigpit na ipinagbabawal sa batas, batay na rin sa kautusan ng DILG, ang paglalagay ng mga iba’t-ibang uri ng maaring makasagabal sa daanan ng tao.



Maging ang nakaparadang motorsiklo sa lansangan ay kanilang sinasabihan ang may-ari nito na alisin upang hindi makaharang sa mga daanan.

Bagamat may mga ilan pa rin na naging pasaway at ipinairal pa rin ng mga nagsagawa ng operasyon ang kanilang pagiging mahinahon at kinausap ang mga ito.



Kanila ring ipinaaalala sa lahat na ang ginagawa nilang ito ay bilang pagtalima na rin sa ipinag-uutos ng nasyunal na pamahalaan.

Ayon naman kay Traffic Management Section Head Retired Captain Jaime De Mesa, ang operasyong ito ay gagawin ng dalawang beses sa loob ng isang araw na kung saan ay magiging random o walang eksaktong araw kung kalian.

Ito aniya ay upang malaman kung sumusunod ang kanilang mga sinabihan sa nasabing aktibidad.

Samantala, binigyang linaw rin naman ni Sir Jaime De Mesa na ang mga makukuhang nakasagabal sa daanan ay dadalhin sa Motorpool at maari naman itong tubusin sa kanilang tanggapan.

Ang pagsasagawa ng ganitong uri ng aktibidad ay batay na rin sa kautusan ng DILG na kung saan ay matagal na ring ipinatutupad hindi lamang sa Lucena kundi maging sa buong bansa.